Så forstod vi at vi hadde tenkt nesten likt

• Main Author: Sommersel, Ellen Overøye
• Format: Dissertation
• Language: Norwegian

Denne masteroppgåva handlar om elevar på mellomtrinnet og kva for rolle matematiske teikn spelar i arbeid med oppgåver. Formålet er å få ei betre forståing for kva som er grunnen til at elevar får til nokre oppgåver, men ikkje andre som er «like». Kan vi få ei betre forståing for kvifor elevane «kan» noko i ein samanheng, men ikkje får til å dra nytte av det i ein annan samanheng? Masteroppgåva presenterer ei kvalitativ studie der elevane sitt arbeid med tekstoppgåver og ei oppgåve med figurtal vert analysert med utgangspunkt i Duval (2006, 2017) og Steinbring (2006) sine teoriar om korleis matematisk kunnskap vert representert med ulike semiotiske teiknsystem, og Brandom (Brandom, 1994, 2000) sin læringsteori, inferensialisme, som tilbyr omgrep for å skildre korleis kunnskapar er kopla saman i ein vev av meining. 22 elevar deltok i studia, 21 deltok i innsamling av skriftlege data, og 7 elevar deltok i oppgåveintervju der arbeidsflata vart filma, og det vart teke lydopptak. Elevane hadde tilgang på ulike konkretar dei kunne nytte for å løyse oppgåvene. Elevane var på fjerde trinn når innsamlinga vart gjennomført. Hovudfunna i mi undersøking er: (1)Elevane nyttar erfaringar frå kvardagen for å finne alternative reknestykke som både kan representere problemet, og som dei meistrar dersom oppgåvestrukturen utfordrar dei. Dei gjer det ved å la nokre teikn få dobbel meining, ei i frå oppgåvekonteksten, og ei i frå svarkonteksten. Dei nyttar også kvardagserfaringar for å vurdere kvaliteten på eigne matematiske løysingar i nokon grad. (2)Reknestykka elevane skriv har ulike funksjonar: Dei representerer den matematiske strukturen i oppgåva, og dei representerer utrekninga av svaret til oppgåva. Det ser ut til at elevane har vanskar med å lese reknestykka som uttrykk for struktur. (3)I arbeid med oppgåver som krev meir enn eitt løysingssteg, på grunn av problemstrukturen, på grunn av eigenskapar ved tala eller på grunn av rekneferdighetane til eleven, ser det ut til å vere krevjande å halde oversikt over dei ulike strukturane som er involvert undervegs i løysingsarbeidet. (4)Elevar fyller ukjente matematiske teikn med si eiga meining, noko som påverkar løysingsstrategien. Studia viser kor samansett matematikklæringa på barneskulen er.